Osmanabad news :-
उस्मानाबाद -भाजपाचे आमदार राणाजगजितसिंह पाटील यांच्या वर्चस्वाखाली चालणार्‍या जिल्हा मजूर फेडरेशनकडून कोणत्याही कामासाठी टक्केवारी घेतली जात आहे. याबाबत अनेक तक्रारी आमच्यापर्यंत पोहचलेल्या असून त्या पुराव्यानिशी सादर करणार आहोत. या भ्रष्टाचाराची चौकशी करावी अशी मागणी शिवसेनेचे तालुकाप्रमुख सतीशकुमार सोमाणी यांनी जिल्हाधिकार्‍यांकडे निवेदनाद्वारे केली आहे. चौकशी करुन दोषींवर गुन्हे दाखल न केल्यास शिवसेना रस्त्यावर उतरुन आंदोलन करेल असा इशाराही तालुकाप्रमुख सतीशकुमार सोमाणी यांनी दिला आहे.
तालुकाप्रमुख सोमाणी यांनी म्हटले आहे की, शासनाकडून मंजूर करण्यात आलेल्या विकासकामाचे वाटप जिल्हा मजूर फेडरेशनच्या शिफारशीनंतर मजूर संस्थांना केले जाते. परंतु या संस्थेकडून फेडरेशनची फीस म्हणून एक टक्का रक्कम घेतली जाते. तर आणखी एक टक्का रक्कम मजूर संस्थेकडून घेतली जाते. ही रक्कम तुम्ही का घेता? म्हणून फेडरेशनकडे विचारणा केली असता त्यांच्या हस्तकाने सांगितले की, फेडरेशनच्या चेअरमन यांना भारतीय जनता पार्टीचे तुळजापूरचे आमदार राणाजगजितसिंह पाटील यांचे सक्त आदेश आहेत की पेमेंट घेतल्याशिवाय कामाची शिफारस द्यायची नाही. त्यामुळे भाजपा हा जसा डिजिटल पक्ष बनला आहे तसा डिजिटल भ्रष्टाचारही त्यांनी सुरु केला आहे.
भाजपाचे जिल्हाध्यक्ष नितीन काळे यांनी काल आमच्या लोकप्रिय खासदार ओमदादा राजेनिंबाळकर यांच्याबद्दल जे वाचाळ वक्तव्य केले, त्याबद्दल सांगायचे तर आमदार राणागजितसिंह पाटील यांना वाड्यावरुन रस्त्यावर आणल्याचे दुःख आहे. याआधी ते मुंबईत बसून जिल्ह्याची सुत्रे हलविण्याचे काम करायचे आता त्यांना वाड्यावरुन वाडी वस्तीपर्यंत जावे लागत आहे. त्यांच्या वाड्यावर येणार्‍या लोकांची संख्या कमी झाल्यामुळे त्यांना पोटशूळ उठला आहे. उलट आमचे खासदारांना जनता प्रत्येक कामासाठी नेहमीच मदतीसाठी फोन करते. खासदार जनतेच्या सेवेसाठी किती वेळ देतात हे जनतेला चांगले माहीत आहे. पण भाजप नेत्यांना पोटशूळ उठल्यामुळे ते जनतेला वेगळ्या वळणावर घेऊन जाण्याचा प्रयत्न करत आहेत. जनतेने त्यांच्या भूलथापांना बळी न पडता सत्य जाणून घ्यावे. तसेच भाजपाचे राणाजगजितसिंह पाटील यांच्या वर्चस्वाखालील मजूर फेडरेशनच्या टक्केवारीची चौकशी करुन कारवाई करावी अन्यथा आम्ही शिवसेनेच्या वतीने तीव्र आंदोलन करणार आहोत असा इशारा शिवसेना तालुकाप्रमुख सतीशकुमार सोमाणी यांनी यावेळी बोलताना दिला.
या निवेदनावर गुणवंत देशमुख (ढोकी), राजाभाऊ भांगे, धनंजय वीर, गोविंद कोळगे, विनोद पवार, रवि कोरे आळणीकर, आण्णासाहेब पवार, राजेंद्र तुपे (पळसप), दिनेश हेड्डा, धनंजय इंगळे, ओंकार आगळे, आबा सारडे, श्रीहरी शिवलकर, नितीन भोसले, दत्ता बंडगर, ओंकार सारडे, सोमनाथ मडके, विष्णू नाईकनवरे, सौदागर जगताप, राजाभाऊ पाडुळे, अमोल मुळे, मुकेश पाटील, आकाश पाटील, किरण चव्हाण, शिवलाल कुर्‍हाडे, युवराज गायकवाड यांची स्वाक्षरी आहे.
