शिंगोली आश्रम शाळेत संत तुकडोजी महाराज व महात्मा बसवेश्वर जयंती उत्साहात साजरी

राज्य मंडळाच्या बारावी परीक्षेचा उद्या ऑनलाईन निकाल - Maharashtra Examination 2022 - RESULT

 

               उस्मानाबाद,दि.07(जिमाका):- महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर  व कोकण या नऊ विभागीय मंडळांमार्फत मार्च-एप्रिल 2022  मध्ये  घेण्यात आलेल्या  उच्च  माध्यमिक  प्रमाणपत्र  (इ. 12 वी)  परीक्षेचा निकाल  पुढील अधिकृत  संकेतस्थळांवर  उद्या , बुधवार  दि. 08  जून  2022 रोजी  दुपारी  1.00 वाजता ऑनलाईन जाहीर करण्यात येत आहे.                             अधिकृत संकेतस्थळांचे पत्ते पुढीलप्रमाणे आहेत.   www.mahresult.nic.in,  

 www.hscresult.mkcl.org,   

https://hsc.mahresults.org.in,   https://lokmat.news18.com,

 https://www.indiatoday.in/education-today/results,              

                         https://mh12.abpmajha.com 

 आणि   https://www.tv9marathi.com/board-result-registration-for-resultmarksheet-12th  

परीक्षेस प्रविष्ट झालेल्या सर्व विद्यार्थ्यांचे विषयनिहाय संपादित केलेले गुण उपरोक्त संकेतस्थळांवरुन उपलब्ध होतील आणि निकालाची प्रत (प्रिंट आऊट) घेता येईल. www.mahresult.nic.in या संकेतस्थळावर विद्यार्थ्यांच्या निकालासोबत निकालाबाबतची इतर सांख्यिकीय माहिती उपलब्ध होईल. तसेच www.mahahsscboard.in या संकेतस्थळावर कनिष्ठ महाविद्यालयांना एकत्रित निकाल उपलब्ध होईल.

             ऑनलाईन निकालानंतर उच्च माध्यमिक प्रमाणपत्र (इ. 12 वी) परीक्षेस प्रविष्ट झालेल्या विद्यार्थ्यास स्वत:च्या अनिवार्य विषयांपैकी (श्रेणी विषयांव्यतिरिक्त) कोणत्याही विशिष्ट विषयात त्याने संपादित केलेल्या गुणांची गुणपडताळणी आणि उत्तरपत्रिकांच्या छायाप्रत, पुनर्मूल्यांकन व स्थलांतर प्रमाणपत्रासाठी संबंधित विभागीय मंडळाकडे ऑनलाईन पध्दतीने मंडळाच्या अधिकृत संकेतस्थळावरुन (http://verification.mh-hsc.ac.in) स्वतः किंवा शाळांमार्फत अर्ज करण्याची सोय उपलब्ध करून देण्यात आलेली आहे. यासाठी आवश्यक अटी, शर्ती आणि सूचना संकेतस्थळावर देण्यात आलेल्या आहेत. गुणपडताळणीसाठी शुक्रवार, दि. 10 ते 20 जून 2022 पर्यंत आणि छायाप्रतीसाठी शुक्रवार, दि. 10  ते 29 जून 2022 पर्यंत अर्ज ऑनलाईन पध्दतीने करता येईल. त्यासोबतच ऑनलाईन पध्दतीने शुल्क (Debit Card/ Credit Card/UPI/Net Banking) याद्वारे भरता येईल.

              मार्च-एप्रिल 2022 उच्च माध्यमिक प्रमाणपत्र (इ. 12 वी) परीक्षेच्या उत्तरपत्रिकेचे पुनर्मूल्यांकनासाठी ऑनलाईन पध्दतीने अर्ज मंडळाच्या अधिकृत संकेतस्थळावरुन करण्यासाठी प्रथम उत्तरपत्रिकेची छायाप्रत घेणे अनिवार्य आहे. छायाप्रत मिळाल्याच्या दिवसापासून कार्यालयीन कामाच्या पाच दिवसांत पुनर्मूल्यांकनाच्या कार्यपध्दतीचा अवलंब करुन विहित नमुन्यात विहित शुल्क भरुन संबंधित विभागीय मंडळाकडे विद्यार्थ्यांनी ऑनलाईन पध्दतीने अर्ज करणे आवश्यक राहील. ज्या विद्यार्थ्यांना उत्तरपत्रिकेचे पुनर्मूल्यांकन करावयाचे असेल त्यांनी अधिक माहितीसाठी संबंधित विभागीय मंडळाकडे संपर्क साधावा.

              मार्च-एप्रिल 2022 च्या उच्च माध्यमिक प्रमाणपत्र (इ. 12 वी) परीक्षेस सर्व विषयांसह प्रविष्ट होऊन उत्तीर्ण होणाऱ्या नियमित विद्यार्थ्यांसाठी लगतच्या दोनच संधी श्रेणी / गुणसुधार ( Class Improvement Scheme) योजनेअंतर्गत उपलब्ध राहतील.

                जुलै-ऑगस्ट 2022 मध्ये आयोजित करण्यात येणाऱ्या पुरवणी परीक्षेसाठी पुनर्परिक्षार्थी आणि श्रेणीसुधार विद्यार्थ्यांसाठी शुक्रवार दि. 10 जून 2022 पासून मंडळाच्या संकेतस्थळावरुन ऑनलाईन पध्दतीने आवेदनपत्र भरुन घेण्यात येणार आहेत. त्याबाबतचे परिपत्रक स्वतंत्रपणे निर्गमित करण्यात येणार आहे. मार्च-एप्रिल 2022 मध्ये उच्च माध्यमिक प्रमाणपत्र (इ.12 वी) परीक्षेस प्रविष्ट झालेल्या विद्यार्थ्यांना गुणपत्रिका त्यांच्या उच्च माध्यमिक शाळा, कनिष्ठ महाविद्यालयामार्फत शुक्रवार दि. 17 जून 2022 रोजी दुपारी 3.00 वाजता वितरित करण्यात येतील. असे महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांनी कळविले आहे.