अणदूर येथील अत्याचार प्रकरणी सर्व आरोपींना अटक करून न्याय देण्याच्या मागणीसाठी आंदोलन
तुळजापूर :- तालुक्यातील अणदूर येथील एका अल्पवयीन विद्यार्थिनीवर तीन आरोपींनी बलात्कार केलेला आहे. यापैकी दोघांना पोलिसांनी अटक केली असून तिसऱ्या आरोपीला अद्यापही अटक केलेली नाही. त्यामुळे सर्व आरोपींना तात्काळ अटक करून पिडीतेला न्याय द्यावा या मागणीसाठी जिल्हाधिकारी कार्यालयासमोर दि.१९ फेब्रुवारी रोजी धरणे आंदोलन करण्यात आले असून जिल्हाधिकाऱ्यांकडे एका निवेदनाद्वारे ग्रामस्थांनी केली आहे.
दिलेल्या निवेदनात असे नमूद करण्यात आले आहे की, दि.२७ जानेवारी रोजी अणदुर येथील एका अल्पवयीन विद्यार्थिनीवर तिघा नराधमांनी नियोजनपूर्वक प्लॅनिंग करून जबरदस्तीने तिच्यावर बलत्कार केला आहे. याप्रकरणी पोलिसांनी फक्त दोन आरोपींना गजाआड केले आहे. तर यातील मुख्य आरोपी असलेला तिसऱ्या व्यक्तीस अद्यापही पोलिसांनी अटक केलेली नाही किंवा त्या संदर्भात योग्य ती पावले उचललेली नाहीत. त्या सर्व आरोपींना अटक करून पिडीतेला न्याय द्यावा यासाठी एक दिवस नळदुर्ग व अणदूर येथे या घटनेचा निषेध करीत व्यक्त करीत कडकडीत बंद देखील पाळण्यात आला होता. विशेष म्हणजे जिल्हाधिकारी व पोलीस अधीक्षक यांना देखील याबाबत शिष्टमंडळाने भेट देऊन या विषयावर चर्चा करून अटक करण्याची मागणी करण्यात आली. त्यांनी देखील केवळ आश्वासन देण्यापलीकडे कोणतीच कारवाई केली नसल्यामुळे पोलीस यंत्रणा जाणीवपूर्वक आरोपीला पाठीशी घालण्याचा प्रयत्न करत असल्याचा आरोप करण्यात आला आहे. यासंदर्भात लेखी निवेदन देऊन व वारंवार मागणी करून देखील जाणीवपूर्वक आरोपीची चौकशी करण्यास नळदुर्ग पोलिस ठाण्यातील संबंधित अधिकाऱ्यांकडून टाळाटाळ केली जात आहे. पोलिसांनी संबंधित आरोपीस तात्काळ अटक न केल्यास तीव्र स्वरूपाचे राज्यभरात आंदोलन करण्यात येणार असल्याचा इशारा देण्यात आला आहे. यावेळी लिंगया स्वामी, शिवाप्पा बताले व श्रीराम मुंबरे यांनी आंदोलन करतांना मार्गदर्शन केले. या निवेदनावर ॲड. दिपक आलुरे, लिंगय्या स्वामी, विठ्ठल खरे, गणेश पाटील, वैशाली शिवाजी स्वामी, बलभीम पाटील, प्रफुल्लकुमार शेटे, चंद्रशेखर कंदले, शिवकुमार स्वामी, वैजिनाथ गुळवे, ॲड सुधीर तानवडे, संजय बताले, मुजीब मौजन, शिवय्या बताले, विजय डुकरे, महेश करपे, एम के माने, लक्ष्मण लंगडे, अनिल बंदपट्टे, शिवाजी स्वामी, सिद्धेश्वर मुडके, श्रमिक पोतदार, अक्षय महाजन, नरेश पाटील, किशोर महाजन, बाळासाहेब पाटील, शरण पाटील, श्रीराम मुंबरे, ऋषिकेश चपने आदींच्या सह्या आहेत
