लोहारा / प्रतिनिधी
लोहारा तालुक्यातील धानूरी येथे मागील काही दिवसांत कोरोना रुग्णसंख्येत वाढ होत असल्याने आमदार ज्ञानराज चौगुले यांनी गावास भेट दिली व ग्रामस्थांशी संवाद साधून सद्यस्थितीचा आढावा घेतला.
यावेळी उपस्थित अधिकाऱ्यांना त्यांनी गावात जास्तीत जास्त नागरिकांच्या चाचण्या करण्यासाठी आरोग्य विभागाच्या ४ स्वतंत्र्य टीम नियुक्त करून वार्डनिहाय काम करावे, गावातील अवैध धंदे हे कोरोनाचे हॉटस्पॉट झाल्यानेहि रुग्णसंख्या वाढत असल्याचे निदर्शनास आल्याने अवैध धंदे चालकांवर कठोर कारवाई करावी, अशा सूचना केल्या. तसेच नागरिकांनी घाबरून न जाता सतत मास्क, सॅनिटायझरचा वापर करावा, प्रशासनाने घालून दिलेल्या नियमांचे पालन करावे, विशेषतः लहान बालकांची विशेष काळजी घ्यावी असे आवाहन केले.
तसेच येत्या 2 दिवसांत धानुरी गावात 30 बेडचे विलगिकरण कक्ष सुरू करण्याचा निर्णय यावेळी झाला. यावेळी युवा नेते किरण गायकवाड, उपविभागीय अधिकारी विठ्ठल उदमले, तहसीलदार संतोष रुईकर, शिवसेना तालुकाप्रमुख मोहन पनुरे, बाबुराव शहापूरे, तालुका आरोग्य अधिकारी डॉ.कटारे, माजी जी प सदस्य दिपक भैय्या जवळगे, प्रा.आनंदराव सूर्यवंशी, संदीपान बनकर ,परमेशवर साळुंके आकाश जाधव सरपंच उपसरपंच गावातील प्रतिष्ठित नागरिक आदी ग्रामस्थ उपस्थित होते.
