प्रधानमंत्री सुक्ष्म अन्न प्रक्रीया उद्योग योजनेचा उदयोजक व शेतक-यांनी लाभ घ्यावा : कौस्तुभ दिवेगावकर
Osmanabadnews :
उस्मानाबाद,दि.07(जिमाका): उस्मानाबाद जिल्हयाचा समावेश आकांक्षित जिल्हयात आहे.जिल्हयामध्ये प्रक्रीया उद्योग करण्यास मोठया प्रमाणात वाव आहे. तसेच जिल्हयातील उद्योजक,शेतकरी,महिला,महिला बचत गट, शेतकरी गट इत्यादींनी प्रधानमंत्री सुक्ष्म अन्न प्रक्रीया उद्योग योजनेचा लाभ मोठया प्रमाणात घ्यावा. असे आवाहन जिल्हाधिकारी कौस्तुभ दिवेगावकर यांनी केले आहे.
असंघटीत अन्न प्रक्रीया क्षेत्रातील सुक्ष्म अन्न प्रक्रीया उद्योगांना वित्त पुरवठा करुन संघटीत क्षेत्रामध्ये आणण्यासाठी प्रधानमंत्री सुक्ष्म अन्न प्रक्रीया उद्योग योजना राबविण्यात येत आहे. प्रधानमंत्री सुक्ष्म अन्न प्रक्रीया उद्योग योजना 2020-21 ते 2024-25 या पाच वर्षाच्या कालावधीत राबविण्याचे नियोजन आहे. यासाठी श्री.दिवेगावकर यांच्या अध्यक्षतेखाली जिल्हास्तरीय समितीची बैठक घेण्यात आली. यावेळी बँकांकडे प्रलंबित असणाऱ्या प्रकरणांचा आढावा घेण्यात आला आणि प्रकरणे तात्काळ निकाली काढण्याबाबत सर्व बँक अधिका-यांना सूचना दिल्या.
योजनेंतर्गत अन्न प्रक्रीया उद्योग,शेतकरी उत्पादक कंपन्या,सहकारी संस्था,शेतकरी, निर्यातदार, स्वयंसहाय्यता बचत गट, शासकीय संस्था अर्ज करु शकतात. 18 वर्षावरील सर्वांना योजनेचा लाभ घेता येईल तसेच शिक्षणाची अट नाही.योजनेंतर्गत वैयक्तीक सुक्ष्म अन्न प्रक्रीया उद्योगांना बँक कर्जाशी निगडीत पात्र प्रकल्पास किमतीच्या 35 टक्यापर्यंत व जास्तीत जास्त 10 लाख रूपयाच्या मर्यादेपर्यंत प्रती प्रकल्पासाठी अनुदान देय असणार आहे. प्रकल्प अहवाल तयार करणे,तांत्रिक मार्गदर्शनासाठी जिल्हा संसाधन व्यक्तींची मदत मिळणार आहे. योजनेंतर्गत सामान्य पायाभूत सुविधांतर्गत 10 कोटीपर्यंतच्या प्रकल्पांना प्रकल्प खर्चाच्या 35 टक्के अर्थसहाय्य मिळणार आहे.
पॅकेजिंग,विपणन,ब्रँडिंगसाठी 50 टक्के अनुदान,कौशल्य प्रशिक्षण पत संलग्नित भांडवल अनुदान प्रती बचत गटास चार लाख बीज भांडवल,सुक्ष्म अन्न प्रक्रीया उद्योग करण्याऱ्या उद्योजक,महिला उद्योजक तयार होऊन रोजगार निर्मितीस संधी,आस्तित्वात
असलेल्या सुक्ष्म उद्योगांचे आधुनिकिकरण,प्रकल्प आराखडा तयार करण्यासाठी संसाधन व्यक्तींची मदत होणार आहे.
योजनेचा लाभ घेण्यासाठी लाभार्थींनी अर्ज स्वत: अथवा संसाधन व्यक्ती यांच्या मदतीने https://pmfme.mofpi.gov.in/ संकेतस्थळावर ऑनलाईन पध्दतीने करावा. अधिक माहितीसाठी तालुका कृषी अधिकारी,उपविभागीय कृषी अधिकारी व जिल्हा अधिक्षक कृषी अधिकारी कार्यालयास संपर्क करावा.
