नागपुर विधीमंडळात हिरकणी कक्षाची सुरूवात , कर्तृत्वाचा व मातृत्वाचा सन्मान करणारे सरकार- मुख्यमंत्री शिंदे , माता सुरक्षित तर घर सुरक्षित- आरोग्य मंत्री सावंत
नागपुर (प्रतिनिधी)
नागपूर येथील विधीमंडळाच्या हिवाळी अधिवेशनात विस्तारित इमारतीमध्ये हिरकणी कक्ष सुरू करण्यात आला असून आज या कक्षाचे उद्घाटन आ.सरोज अहिरे यांच्या हस्ते मुख्यमंत्री एकनाथ शिंदे,आरोग्य मंत्री प्रा.डॉ. तानाजी सावंत शिक्षण मंत्री दीपक केसरकर यांच्या उपस्थितीत करण्यात आले.
हिवाळी अधिवेशनासाठी तान्हुल्यासह आलेल्या आमदार सौ.सरोज अहिरे यांना बाळाची काळजी घेता यावी, यासाठी आरोग्य मंत्री सावंत यांनी मुख्यमंत्री एकनाथ शिंदे यांच्याशी चर्चा करून तात्काळ विधानभवनात आज हिरकणी कक्षाची सुरूवात केली. विशेष म्हणजे या कक्षाचे आमदार सौ.सरोज अहिरे यांच्याच हस्ते उद्घाटन करण्यात आले. फक्त आमदारच नाहीतर नोकरदार महिलांना देखील त्यांच्या तान्हूल्याची काळजी, स्तनपान करता यावे याकरिता या कार्यालयांमध्ये हिरकणी कक्ष तयार करून देण्यात आले आहेत.
आरोग्य विभागाच्या माध्यमातून त्याचे कामकाज केले जात असून याठिकाणी स्वतंत्र खोली, पाळणा, वैद्यकीय सुविधा या उपलब्ध करून देण्यात आल्या आहेत. एवढेच नाहीतर या कक्षासाठी एक डॉक्टर, दोन नर्स अशी व्यवस्था करण्यात आली आहे.
अधिवेशनासाठी बाळासह आलेल्या आमदार सौ.सरोज अहिरे यांच्या कर्तृत्व आणि मातृत्वाचा सन्मान करीत काल त्यांचे कौतुक केले होते. आज हिरकणी कक्षाचे उद्घाटन देखील आमदार सौ.अहिरे यांच्या हस्ते करावे असे मत काल व्यक्त केले होते. त्यानुसार सकाळी या कक्षाचे उद्घाटन करण्यात आले.
