Osmanabad news
उस्मानाबाद येथे प्रधानमंत्री नरेंद्र मोदी यांच्या प्रतिमेवर मारली फुले!
उस्मानाबाद -
दिल्लीचे मुख्यमंत्री अरविंद केजरीवाल यांच्या घरावर भारतीय जनता पार्टीच्या कार्यकर्त्यांनी केलेल्या भ्याड हल्ल्याच्या घटनेचा उस्मानाबाद येथे आम आदमी पार्टीच्या वतीने तीव्र शब्दांत निषेध करण्यात आला. शहरातील छत्रपती शिवाजी महाराज चौक येथे आज (दि.31) प्रधानमंत्री नरेंद्र मोदी यांच्या प्रतिमेवर फुले फेकून गांधीगिरी पद्धतीने आंदोलन करण्यात आले. यावेळी भारतीय जनता पार्टीच्या निषेधाच्या घोषणा कार्यकर्त्यांनी दिल्या.
’द काश्मिर फाइल्स’ चित्रपटाबाबत मुख्यमंत्री अरविंद केजरीवाल यांनी मांडलेले मत न रुचलेल्या भारतीय जनता पार्टीच्या कार्यकर्त्यांनी नवी दिल्ली येथे मुख्यमंत्र्यांच्या घरावर हल्ला करत तोडफोड केली. या घटनेच्या निषेधार्थ उस्मानाबादेत छत्रपती शिवाजी महाराज चौक येथे आम आदमी पार्टीचे जिल्हाध्यक्ष अॅड.अजित खोत यांच्या नेतृत्वाखाली आंदोलन करण्यात आले. आप कार्यकर्त्यानी प्रधानमंत्री नरेंद्र मोदी यांच्या प्रतिमेवर फुले फेकून गांधीगिरी आंदोलन केले. या आंदोलनात आम आदमी पार्टीचे युवक जिल्हाध्यक्ष आकाश कावळे,कमलाकर ठवरे, मुन्ना शेख, तानाजी पिंपळे, शहाजी पवार, उस्मान तांबोळी, अंकुश चौगुले, प्रेमकुमार वाघमारे, किरण शिंदे, नामदेव वाघमारे, संगाप्पा बेद्रे, रघु गोरे आदी सहभागी झाले होते.
आंदोलन स्थळाची ‘झाडू’ने केली स्वच्छता
आम आदमी पार्टीने छत्रपती शिवाजी महाराज चौक येथे गांधीगिरी आंदोलन केल्यानंतर पक्षाचे चिन्ह असलेल्या ‘झाडू’ने आंदोलन स्थळाची स्वच्छता करुन वेगळा संदेश कार्यकर्त्यांनी दिला.
त्यांनी दगड मारले, आम्ही फुले!
द काश्मिर फाइल्सच्या विषयावर मुख्यमंत्री केजरीवाल यांनी चित्रपट प्रदर्शित करुन काश्मिरी पंडितांना न्याय मिळणार नाही. अशी भूमिका आम आदमी पार्टीचे अध्यक्ष, मुख्यमंत्री अरविंद केजरीवाल यांनी मांडली. त्याचा चुकीचा अर्थ काढून भारतीय जनता पार्टीच्या कार्यकर्त्यांनी केजरीवाल यांच्या घरावर दगड मारलेत. पण आम्ही देशाचे पंतप्रधान नरेंद्र मोदी यांच्या प्रतिमेवर फुले मारुन प्रतिकात्मक आंदोलन केले.
अॅड. अजित खोत
जिल्हाध्यक्ष, आम आदमी पार्टी
