उस्मानाबादसह पुणे येथील चोरीच्या मालासह आरोपी ताब्यात.
स्थानिक गुन्हे शाखा : बाभळगाव, ता. तुळजापूर येथील विजय भास्करराव पाटील हे दि. 22.04.2022 वा. सु. 04.00 वा. सु. आपल्या घरात झोपलेले असताना अनोळखी व्यक्तींनी त्यांच्या घराची कडी उघडून घरात प्रवेश करुन विजय यांसह त्यांच्या पत्नीस चाकूचा धाक दाखवून विजय यांच्या पत्नीच्या अंगावरील व घरातील कपाटातील 35 ग्रॅम सुवर्ण दागिने, ½ कि.ग्रॅ. वजनाचे चांदीचे दागिने- वस्तू व 53,000 ₹ रोख रक्कम असा माल जबरीने चोरुन नेला होता. दुसऱ्या घटनेत अणदूर, ता. तुळजापूर येथील प्रणिता मुक्तेश्वर कबाडे यांच्या घराचा कडी- कोयंडा अज्ञात व्यक्तीने दि. 22.04.2022 रोजी 01.45 ते 04.00 वा. दरम्यान उचकटून घरातील 25,000₹ रक्कम व चांदीच्या वस्तू तर गावातील डॉ. प्रशांत सिद्रमप्पा झंगे यांच्या दवाखान्यातील तिजोरीतील 7,000 ₹ व दिपक कार्ले यांच्या प्रयोगशाळेतील तिजोरीतील 60,000 ₹ रक्कम चोरुन नेली. यावरुन विजय पाटील यांच्या प्रथम खबरेवरुन भा.दं.सं. कलम- 392, 34 अंतर्गत तर प्रणिता कबाडे यांच्या प्रथम खबरेवरुन भा.दं.सं. कलम- 457, 380 अंतर्गत नळदुर्ग पो.ठा. येथे गुन्हे नोंदवले आहेत.
सदर गुन्ह्याच्या तपासात मा. पोलीस अधीक्षक श्री. अतुल कुलकर्णी यांच्या मार्गदर्शनाखाली स्थानिक गुन्हे शाखेचे पोनि- श्री. रामेश्वर खनाळ, सपोनि- श्री. शैलेश पवार, पोहेकॉ- प्रकाश औताडे, महेबुब अरब, पोना- हुसेन सय्यद, अमोल चव्हाण, शैला टेळे, पोकॉ- रविंद्र आरसेवाड, साईनाथ आशमोड, सहाणे यांच्या पथकाने गोपनीय माहितीच्या आधारे आरोपी नामे- अजय सुनिल भोसले, रा. धनेगाव, ता. तुळजापूर यास काल दि. 22 जून रोजी धनेगाव शिवारातून ताब्यात घेउन वरील नमूद गुन्ह्याच्या अनुशंगाने कसून व कौशल्यपुर्ण तपास केला. यात त्याने गुन्हा केल्याची कबुली देउन त्याच्याकडून गुन्ह्यातील 35 ग्रॅम सुवर्ण दागिने, 7,000 ₹ रोख रक्कम तसेच बजाज पल्सर, होंडा शाईन व हिरो स्प्लेंडर या तीन मोटारसायकलीही जप्त केल्या. या तीन मोटारसायकलीच्या इंजन व सांगाडा क्रमांकाच्या आधारे माहिती घेतली आसता सदर मोटारसायकली या पुणे जिल्ह्यातून चोरीस गेल्यावरुन तेथील खेड पो.ठा. येथे गुन्हा क्र. 373/ 2022, चाकन पो.ठा. येथे गुन्हा क्र. 515/ 2022, व भोसरी एमआयडीसी पो.ठा. येथे 183/ 2022 हे भा.दं.सं. कलम- 379 अंतर्गत दाखल आहेत. सदर प्रकरणी पुणे जिल्ह्यातील नमूद पोलीस ठाण्यास कळवले असून आरोपीस पुढील कारवाई करीता नळदुर्ग पोलीस ठाण्याच्या ताब्यात दिले आहे.
