पोलीसांच्या रात्रगस्तीमुळे डिझेल चोरीचा प्रयत्न फसला
तामलवाडी पोलीस ठाणे : तामलवाडी पो.ठा. चे पथक दि. 05 ऑगस्ट रोजी पहाटे 04.00 वा. सु. माळुंब्रा शिवारातील महामार्गावर गस्त करत होते. यावेळी एका धाब्याजवळ उभ्या असलेल्या ट्रक जवळ तीन पुरुष उभे असल्याचे दिसल्याने पोलीसांनी आपला मोर्चा तीकडे वळवताच पोलीसांना पाहुन ते तीघे अंधारात पसार झाले.
यावेळी त्या ट्रकच्या बाजूस एक सुमो कार क्र. एम.एच. 24 सी 8731 ही बेवारस असून त्या ट्रकच्या इंधन टाकीचे कुलूप तोडून त्यातील डिझेल नळीद्वारे उपसून प्लास्टीक कॅनमध्ये भरुन चोरी केली जात असल्याचे पोलीसांना समजले. यावर पोलीसांनी त्या ट्रक चालकास झोपेतून उठवून घडल्या प्रकाराची माहिती दिली. पोलीसांनी घटनास्थळावरील डिझेलसह कॅन, नळी व सुमो वाहन जप्त केले असून त्या वाहनाची मालकी शोधून पोलीस तपासाची पुढील दिशा ठरवत आहेत.
या प्रकरणी ट्रक चालक- उदय गंगाराम, रा. उत्तरप्रदेश यांच्या प्रथम खबरेवरुन तामलवाडी पो.ठा. येथे गुन्हा क्र. 122/ 2022 हा भा.दं.सं. कलम- 379, 511, 34 अंतर्गत नोंदवला आहे.
