शिंगोली आश्रम शाळेत संत तुकडोजी महाराज व महात्मा बसवेश्वर जयंती उत्साहात साजरी

उस्मानाबाद शहरात वैद्यकीय शिक्षण संकुल ही अभिनव संकल्पना विकसित करण्यासाठी वैद्यकीय शिक्षण मंत्री ना. गिरीशजी महाजन यांच्याकडे दिवाळीनंतर बैठक – आ. राणाजगजितसिंह पाटील

उस्मानाबाद :- शहरात ‘वैद्यकीय शिक्षण संकुल’ ही अभिनव संकल्पना विकसित करण्यासाठी वैद्यकीय शिक्षण मंत्री ना.श्री.गिरीशजी महाजन यांना भेटून सविस्तर चर्चा करण्यात आली असून दिवाळीनंतर संबंधीत अधिकाऱ्यांची बैठक बोलविण्याचे ठरले असल्याची माहिती आ. राणाजगजितसिंह पाटील यांनी दिली आहे. वैद्यकीय शिक्षण मंत्री ना. गिरीशजी महाजन यांच्याकडे केली आहे.. 

ना.श्री.गिरीशजी महाजन यांनी सन २०१६ साली उस्मानाबाद शहरात महाआरोग्य शिबिराच्या उद्घाटनासाठी आल्यानंतर शासकीय वैद्यकीय महाविद्यालयाची घोषणा केली होती. सातत्याच्या पाठपुराव्या नंतर महाविकास आघाडी सरकारने सन जानेवारी २०२१ मध्ये मंजुरीचा आदेश काढला परंतु आवश्यक बाबींची पूर्तता न केल्याने फेब्रुवारी २०२२ मध्ये राष्ट्रीय आयुर्विज्ञान संस्थेने पाहणी करून परवानगी नाकारली होती. मात्र शिंदे-फडणीस सरकार आल्यानंतर युद्धपातळीवर राष्ट्रीय आयुर्विज्ञान संस्थेने काढलेल्या त्रुटींची दुरूस्ती करवून घेतली. पुन्हा पाहणी करण्यात आली आणि नुकतीच महाविद्यालयाला परवानगी मिळाली आहे. दिवाळीनंतर प्रवेश प्रक्रिया सुरू होत आहेत.

नवीन शासकीय महाविद्यालयासह वैद्यकीय शिक्षण संकुल विकसित व्हावे ही उस्मानाबादकरांची आग्रही मागणी आहे. सदरील ठिकाणी एम.बी.बी.एस. च्या महाविद्यालया पुरतेच मर्यादित न राहता विस्तार व्हावा व या ठिकाणी दंत (डेंटल)महाविद्यालय, भौतीकोपचार (फिजिओथेरपी) महाविद्यालय, परिचर्या (नर्सिंग) महाविद्यालय असे परिपूर्ण वैद्यकीय संकुल विकसित करावे हा या मागचा उद्देश आहे.

या अनुषंगाने त्यांची भेट घेऊन पुढील मुद्यांवर चर्चा केली व यावर निर्णय होणे अपेक्षित आहेत.

- उस्मानाबाद येथील शासकीय औद्योगिक प्रशिक्षण केंद्राची ३० एकर व त्या जवळील जलसंपदा विभागाची २० एकर अशी ५० एकर जागा या प्रस्तावित संकुलासाठी उपलब्ध करण्यात यावी.

- शासकीय औद्योगिक प्रशिक्षण केंद्र हे धाराशिव येथील शासकीय तंत्रनिकेतनच्या उपलब्ध रिकाम्या जागेत स्थलांतरित करण्यात यावे.

- वैद्यकीय महाविद्यालयाचे नियोजन करत असताना १००० खाटांचे सुसज्ज असे रुग्णालय व २५० पर्यंतचा विद्यार्थी प्रवेश लक्षात घेऊन वैद्यकीय महाविद्यालयाची रचना व्हावी. यात पदव्युत्तर आणि अतिविषेश पदव्युत्तर अभ्यासक्रम (सुपर स्पेशालिटी) सुरू करण्याचा विचार देखील व्हावा. याची अंमलबजावणी टप्या टप्याने होणार हे गृहीत धरून महाविद्यालयाची इमारत व परिसराचे नियोजन सुरुवातीलाच व्हावे.

- सदर नियोजन करताना शासकीय वैद्यकीय महाविद्यालय, सातारा प्रमाणे सार्वजनिक बांधकाम विभागास एकत्रित बृहत आराखडा तयार करण्यास्तव प्रकल्प व्यवस्थापन सल्लागाराची नियुक्ती करणे आणि याअंतर्गत वैद्यकीय सल्लागारची तरतूद ठेवावी.

- या संकुलामध्ये वैद्यकीय महाविद्यालयासह दंत महाविद्यालय, भौतीकोपचार, परिचर्या महाविद्यालय यांचा समावेश असणे गरजेचे वाटते. अशा वैद्यकीय शिक्षण संकुलाचा प्राथमिक प्रस्ताव बनविण्यात यावा.

सदरील मागण्या पूर्ण होण्यासाठी संबधित अधिकाऱ्यांची बैठक घेण्याची विनंती वैद्यकीय शिक्षण मंत्री ना.श्री.गिरीशजी महाजन यांच्याकडे केली असून दिवाळी नंतर या विषयावर बैठक घेण्याचे त्यांनी मान्य केले आहे.

सदरील बैठकीसाठी वैद्यकीय शिक्षण विभाग, महसूल, जलसंपदा, उच्च व तंत्र शिक्षण विभागाचे सचिव व संबंधित अधिकारी तसेच जिल्हाधिकारी - उस्मानाबाद, मुख्य अभियंता सार्वजनिक बांधकाम विभाग, कार्यकारी संचालक- गोदावरी मराठवाडा पाटबंधारे विकास महामंडळ, अधिष्ठाता शासकीय वैद्यकीय महाविद्यालय धाराशिव, प्राचार्य शासकीय तंत्रनिकेतन उस्मानाबाद, प्राचार्य शासकीय औद्योगिक प्रशिक्षण केंद्र धाराशिव यांना बोलाविण्याचे ठरले.

यावेळी आई तुळजाभवानीचा महिमा सांगणारी दिनदर्शिका त्यांना भेट देण्यात आली.