नैसर्गिक आपत्ती संदर्भात सर्व संबधित यंत्रणा आणि जनतेने खबरदारी घ्यावी - महेंद्रकुमार कांबळे
उस्मानाबाद,दि.20( osmanabad news ): भारतीय हवामान खाते प्रादेशिक हवामानशास्त्र केंद्र मुंबई यांनी दिलेल्या सुचनेनुसार दि. 19 व 20 जुलै 2023 या काळात मराठवाड्यातील काही जिल्ह्यासाठी यलो अलर्ट जारी केला आहे. त्यामध्ये उस्मानाबाद जिल्ह्याचा समावेश आहे. विजेच्या कडकडाटासह पाऊस पडण्याची शक्यता वर्तविली आहे. या नैसर्गिक आपत्ती संदर्भात खबरदारीची उपाययोजना म्हणून पुढील प्रमाणे काळजी घ्यावी.
या गोष्टी करा :
विजेच्या गडगडाटासह पावसाची पुर्वकल्पना असल्यास बाहेर जाणे टाळा. आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका. आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा. तारांचे कुंपण, विजेचे खांब आणि इतर लोखंडी वस्तूंपासून दूर रहा. पाण्यात उभे असाल तर तात्काळ पाण्यासून बाहेर पडा. तसेच नागरिकांनी आपले शेतमाल व पशुधन वेळेतच सुरक्षित स्थळी ठेवावे.
या गोष्टी करु नका :
आकाशात विजा चमकत असल्यास घरातील लँडलाईन फोनचा वापर करु नका. शोंवरखाली अंधोळ करु नका. घरातील बेसिनचे नळ, पाण्याची पाईपलाइन यांना स्पर्श करु नका तसेच कुठल्याही विद्युत उपकरणांचा वापर करु नका. विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका. उंच झाडाच्या खाली आसरा घेऊ नका. धातूंच्या उंच मनोऱ्याजवळ उभे टाकू नका. जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे.असे आवाहन निवासी उपजिल्हाधिकारी तथा जिल्हा आपत्ती व्यवस्थापन प्राधिकरणाचे सचिव महेंद्रकुमार कांबळे यांनी केले आहे.
