निम्न तेरणा उपसा सिंचन योजना दुरुस्ती मंजुरीच्या टप्प्यात ६८९० हेक्टर क्षेत्र सिंचनाखाली येणार – आ. राणाजगजितसिंह पाटील
उस्मानाबाद-धाराशिव :
मागील 10 वर्षापेक्षा अधिक काळापासून बंद असलेली निम्न तेरणा उपसा सिंचन योजना कार्यान्वित करण्यासाठी या योजनेच्या विशेष दुरस्तीचा रु. 98.14 कोटी चा प्रस्ताव गोदावरी मराठवाडा पाटबंधारे विकास महामंडळाच्या कार्यकारी संचालकांच्या मंजुरीने उच्चाधिकार समिती च्या बैठकीसाठी ठेवण्यात येत आहे.
सदरील योजना औसा व धाराशिव तालुक्यातील शेतकऱ्यांसाठी अतिशय महत्वाची असून यामुळे ६८९० हेक्टर क्षेत्र सिंचनाखाली येणार आहे. या योजनेचे आशिव, कानेगाव, करजखेडा, वडाळा, बामणी असे ५ टप्पे आहेत. या भागातील शेतकऱ्यांना याचा मोठा लाभ होणार आहे. अनेक वर्षा पासून बंद असलेली ही योजना कार्यान्वित करण्यासाठी मागील वर्षभरपासून सातत्याने प्रयत्न सुरू आहेत. राज्याचे उप मुख्यमंत्री तथा जलसंपदा मंत्री ना. देवेंद्रजी फडणवीस यांना नोव्हेंबर २०२२ मध्ये भेटून ही योजना कार्यान्वित करण्यासाठी निधी उपलब्ध करून देण्याची विनंती केली होती. त्यानुसार जलसंपदा विभागाच्या अपर मुख्य सचिवांना कार्यवाही करण्याचे आदेश त्यांनी दिले होते.
योजना कार्यान्वित करण्यासाठी स्थापत्य, विद्युत व यांत्रिकी या तिन्ही विभागाची दुरुस्ती आवश्यक होती. त्यामुळे अंदाजपत्रके व त्यांच्या मान्यतेची प्रक्रिया बरीच क्लिष्ट होती. मात्र सातत्याच्या पाठपुराव्याने आता अंतिम मंजुरीसाठी प्रस्ताव गोदावरी मराठवाडा पाटबंधारे विकास महामंडळाचे कार्यकारी संचालक यांच्याकडून उच्चाधिकार समितीच्या मान्यतेसाठी पाठविण्यात येत आहे. या योजनेच्या स्थापत्य दुरुस्ती साठी रु. ३५.६१, विद्युत दुरुस्ती साठी रु. १८.०६ कोटी व यांत्रिकी विभागाच्या दुरुस्ती साठी रु. ४४.४७ अशा एकूण रु ९८.१४ कोटीची आवश्यकता आहे.
उच्चाधिकार समितीच्या मान्यतेने सदरील प्रस्ताव शासनाकडे पाठविण्यात येणार आहे. उच्चाधिकार समिती व शासनाची मंजूरी लवकरात लवकर मिळवून घेण्यासाठी यापुढेही सातत्याने पाठपुरावा सुरू राहणार असून अनेक दिवसापासून बंद असलेली ही योजना आता सुरू होण्याच्या टप्प्यात आहे.
