लॉकडाऊनने घेतला सांजा येथील सलून व्यवसायकाचा बळी विषारी औषध प्राशन करून केली आत्महत्या
उपजिवीका भागत नसल्याने सलून दुकानदार झेंडेनी केली आत्महत्या
सुसाईड नोटमध्ये सरकारच्या धोरणामुळे हतबल होऊन उचलले टोकाचे पाऊल
उस्मानाबाद दि.११ (प्रतिनिधी) - तालुक्यातील सांजा येथील मनोज झेंडे या नाभिक समाजातील बांधवांने उपजीविका कशी भागवायची ? या विवंचनेने हतबल होऊन विष प्राशन करुन आत्महत्या केली. घरची परिस्थिती बेताचीच, दैनंदिन सलून व्यवसायावर कुटुंबाचा उदरनिर्वाह चालत असे मात्र काही दिवसांपासून सलून बंद झाल्याने अन् गतवर्षी एका मुलीचे लग्न केल्याने कर्जबाजारी झाला होता. सरकारने सलून दुकाने बंद केल्यामुळे कुटुंबाची उपजिवीका भागत नसल्याने व आर्थिक देणे-पाणी झाल्याने विष पेऊन आत्महत्या केली असून मरण्यापुर्वी त्यांनी चिठीत हे सर्व नमुद केले आहे.
उस्मानाबाद तालुक्यातील सांजा येथील मनोज झेंडे यांच्या कुटुंबात २ मुले आहेत. तर एका मुलीचे गतवर्षी लग्न झाले असून पत्नी व २ मुले असा परिवार आहे. रोज सलून दुकानाच्या माध्यमातून मिळणाऱ्या कमाईवर घरप्रपंच सुरू असायचा कोरोना आला अन् सर्व काही बघडत गेले. मागचे वर्ष ही असेच गेले अन् आता कुठे व्यवस्था सुरळीत होत असताना पुन्हा सलून दुकाने बंद करण्याचा निर्णय सरकारने घेतला. त्यामुळे घरगाडा चालविताना आर्थिक समस्या निर्माण होत होत्या. पुर्वीच डोक्यावर कर्जाचा ओझं अन् आता हाताला काम नसल्याने मनोज झेंडे यांनी विष प्राशन करुन टोकाचे पाऊल उचलत आत्महत्या केली.
* सरकारने आर्थिक मदत करावी - माने
सरकारने हातावरचे पोट असणाऱ्या सलून दुकानदाराला कोरोनाचे नियम अटी शर्थी लावून काम करण्याची परवानगी द्यावी. अन्यथा प्रत्येक नाभिक बांधवांना अर्थिक मदत करावी. तसेच सांजा येथील मयत मनोज झेंडे यांच्या कुटुंबियांना अर्थिक मदत करावी अशी मागणी महाराष्ट्र नाभिक महामंडळाचे उस्मानाबाद जिल्हाध्यक्ष लक्ष्मण माने यांनी केली आहे.
