उस्मानाबाद,दि.24(जिमाका):- दि. 26 जानेवारी 2023 रोजी प्रजासत्ताक दिन 73 वा वर्धापन दिनाच्या निमीत्ताने राष्ट्रध्वजारोहणाचा मुख्य शासकीय कार्यक्रम पालकमंत्री प्रा.डॉ.तानाजीराव सावंत यांच्या शुभहस्ते सकाळी ठिक 9.15 वाजता येथील श्री. तुळजाभवानी जिल्हा क्रीडा संकुल मैदान येथे संपन्न होणार आहे. तसेच जिल्हाधिकारी कार्यालय येथील प्रांगणात ध्वजारोहणाचा कार्यक्रम जिल्हाधिकारी डॉ.सचिन ओम्बासे यांच्या शुभहस्ते दि. 26 जानेवारी, 2023 रोजी सकाळी 8.15 वाजता संपन्न होणार आहे. ध्वजारोहणाच्या कार्यक्रमाच्या दिवशी विविध मागण्या संदर्भात लोक, संघटना, पक्ष, कार्यकर्ते हे जिल्हाधिकारी कार्यालयासमोर उपोषण, धरणे, मोर्चा, रॅली, आत्मदहन, रस्ता रोको अशा कार्यक्रमांचे आयोजन करतात.
त्याअनुषंगाने शहरातील श्री. छत्रपती शिवाजी महाराज यांचा पुतळा - सर्कीट हाऊस शिंगोली ते श्री. तुळजाभवानी जिल्हा क्रिडा संकुल पर्यंत दि. 25 जानेवारी 2023 चे 00.00 वाजलेपासून ते दि. 26 जानेवारी 2023 च्या 24.00 वाजेपर्यंत आंदोलनात्मक कार्यक्रम घेण्यास बंदी आदेश काढणे आवश्यक असल्याचे जिल्हा दंडाधिकारी आणि पोलीस अधीक्षक यांच्या पूर्वतयारी बैठकीत ठरले आहे.
जिल्हाधिकारी कार्यालयाच्या प्रांगणामध्ये तसेच श्री. तुळजाभवानी जिल्हा क्रिडा संकुल ते श्री छत्रपती शिवाजी महाराजांचे पुतळा - सर्कीट हाऊस शिंगोली पर्यंत ध्वजारोहणाच्या दिवशी उपद्रव कमी करण्याकामी तसेच आंदोलनात्मक कार्यक्रम घेण्यात येऊ नयेत म्हणून श्री. तुळजाभवानी जिल्हा क्रिडा संकुल उस्मानाबाद ते श्री. छत्रपती शिवाजी महाराजांचा पुतळा - सर्कीट हाऊस शिंगोली पर्यंत फौजदारी प्रक्रिया संहिता 1973 चे कलम 144 लागू करणे आवश्यक आहे. तसेच प्रतिबंधात्मक आदेश लागू करण्यात आले आहेत.
उस्मानाबाद उपविभागीय दंडाधिकारी योगेश भिमराव खरमाटे यांनी फौजदारी प्रक्रिया संहिता 1973 चे कलम 144 अन्वये असे आदेशीत केले आहे की, दि. 25 जानेवारी 2023 च्या 00.00 ते दि. 26 जानेवारी 2023 च्या 24.00 वाजेपर्यंत उस्मानाबाद येथील श्री. तुळजाभवानी जिल्हा क्रिडा संकुल ते श्री छत्रपती शिवाजी महाराजांचे पुतळा - सर्कीट हाऊस शिंगोली पर्यंत धरणे, उपोषण, ध्वनीक्षेपकाचा वापर मोर्चा आदी आंदोलनात्मक कार्यक्रम घेण्यास प्रतिबंध करण्यात आला आहे.
