तेरखेडा येथे जागतिक आदिवासी दिनानिमित्त कायदेविषयक जनजागृती, आरोग्य तपासणी व शासकीय योजनांचे लाभ आणि त्याचे प्रत्यक्ष वाटप शिबीर उत्साहात संपन्न
उस्मानाबाद,दि.12( osmanabad news ):- जिल्हा विधी सेवा प्राधिकरण, पोलिस अधिक्षक कार्यालय आणि वाशी तालुका विधी सेवा समिती यांच्या संयुक्त विद्यमाने "जागतिक आदिवासी दिना” निमित्त कायदेविषयक जनजागृती, आरोग्य तपासणी, शासकीय योजनांचे लाभ व त्याचे प्रत्यक्ष वाटप शिबीर” याचे आयोजन वाशी तालुक्यातील तेरखेडा येथील सुहासिनी मंगल कार्यालयात उत्साहाच्या वातावरणात आयोजित करण्यात आला. यावेळी तेरखेडा येथील प्राथमिक आरोग्य केंद्र, येथे प्रमुख जिल्हा न्यायाधीश तथा जिल्हा विधी सेवा प्राधिकरणाच्या अध्यक्षा अंजू एस. शेंडे यांच्या हस्ते वृक्षारोपण कार्यक्रमाचेही आयोजन करण्यात आले.
या कार्यक्रमासाठी प्रमुख जिल्हा न्यायाधीश तथा जिल्हा विधी सेवा प्राधिकरण अध्यक्षा अंजू एस. शेंडे ह्या अध्यक्षस्थानी उपस्थित होत्या. प्रमुख पाहुणे म्हणून भूमचे जिल्हा न्यायाधीश-1 एस.आर. उगले, जिल्हा पोलिस अधीक्षक अतुल कुलकर्णी, अप्पर पोलिस अधीक्षक नवनीत काँवत, जिल्हा परिषदेच्या मुख्य कार्यकारी अधिकारी (प्र.) प्रांजल शिंदे, वाशीचे गटविकास अधिकारी एन. पी. राजगुरु, वाशीचे तहसीलदार नरसिंग जाधव, येरमाळाचे सहाय्यक पोलिस निरीक्षक अतुल पाटील आणि वाशी विधिज्ञ मंडळाचे अध्यक्ष आर. एन. पवार आदी उपस्थित होते.
या कार्यक्रमाच्या सुरवातीस आदिवासी समाजातील मुलींनी आदिवासी नृत्य सादर केले. या कार्यक्रमास वाशी, भूम व कळंब या तालुक्यातील सर्व आदिवासी समाजातील लोक उपस्थित होते. या कार्यक्रमामध्ये पात्र आदिवासी लाभार्थ्यांना शबरी घरकुल आवास योजनेअंतर्गत प्रमाणपत्र, शिधापत्रिकांचे वाटप करण्यात आले. या कार्यक्रमास 1000 आदिवासी समाजातील महिला व पुरुष उपस्थित होते. त्यांना विविध शासकीय योजनेबाबत पोलिस अधीक्षक अतुल कुलकर्णी, तहसीलदार नससिंग जाधव, व प्रमुख जिल्हा न्यायाधीश तथा जिल्हा विधी सेवा प्राधिकरण अध्यक्षा अंजू. एस. शेंडे यांनी मार्गदर्शन केले.
जिल्हा विधी सेवा प्राधिकरणचे सचिव वसंत यादव यांनी आजच्या आदिवासी दिनानिमित्त कायदेविषयक जनजागृती शिबीराची प्रस्तावना केली आणि श्रीमती शेंडे यांनी आदिवासी समाजाचा विकास करण्यासाठी आदिवासी समाजातील तरुण मुला-मुलींना शिक्षण देणे ही मुलभूत गरज आहे, या विषयावर मार्गदर्शन केले. " या कार्यक्रमामध्ये पायाने अपंग असलेल्या लाभार्थ्यांना शासकीय योजनांच्या लाभाचे प्रमाणपत्र वाटप प्रसंगी श्रीमती अंजू. एस. शेंडे व व्यासपीठावरील सर्व मान्यवर यांनी व्यासपीठावरुन खाली उतरुन प्रत्यक्ष लाभार्थ्याच्या आसनाजवळ जाऊन लाभाच्या प्रमाणपत्राचे वाटप केले हे या कार्यक्रमाचे खास वैशिष्ठ्ये ठरले.” या शिबीरामध्ये उस्मानाबाद शासकीय आयुर्वेदिक महाविद्यालय येथील डॉक्टरांनी गरजूंना वैद्यकीय उपचार करुन औषधांचे वाटप केले. या कार्यक्रमासाठी वाशीच्या तालुका विधी सेवा समितीच्या अध्यक्षा जे. एस. गायकवाड यांचे विशेष सहकार्य लाभले.
