उस्मानाबाद जिल्ह्यातील नागरिकांना कोविड-१९ विषाणूच्या अनुषंगाने जाहीर आवाहन , BF-7 , osmanabad
उस्मानाबाद जिल्ह्यातील जनतेस याद्वारे कळविण्यात येते की, मा. सचिव, आरोग्य व कुटुंब कल्याण विभाग, भारत सरकार यांचे दि. 20 व 23 डिसेंबर 2022 रोजीच्या पत्रान्वये जपान, अमेरिका, कोरिया प्रजासत्ताक, ब्राझील व चीन या देशांमध्ये कोविड-19 विषाणूच्या झालेल्या प्रादुर्भावाच्या पार्श्वभूमीवर तसेच देशातील आगामी सणउत्सवाच्या पार्श्वभूमीवर देशामध्ये कोविड-19 चा प्रादुर्भाव होऊ नये याकरिता तात्काळ आवश्यक त्या खबरदारीच्या उपाययोजना करणेबाबत सूचना दिल्या आहेत. तसेच इंडियन मेडिकल असोसिएशन, नवी दिल्ली यांनी त्यांचे प्रसिद्धीपत्रक दि. 22 डिसेंबर 2022 अन्वये चीन या देशात आढळून आलेल्या कोविड-19 विषाणूच्या BF-7 या प्रकाराने बाधित झालेले चार रुग्ण देशात आढळून आले असल्याची माहिती प्रसिद्ध केली आहे. या पार्श्वभूमीवर "प्रतिबंध हा उपचारापेक्षा अधिक चांगला " या तत्वानुसार उस्मानाबाद जिल्ह्यातील जनतेने
घाबरून न जाता कोविड-19 चा प्रादुर्भाव होऊ नये याकरिता खालील नमूद बाबीचे पालन नागरिकांनी करावे असे आवाहन जिल्हाधिकारी तथा अध्यक्ष जिल्हा आपती व्यवस्थापन प्राधिकरण, उस्मानाबाद यांनी केले आहे.
1. सार्वजनिक ठिकाणी वावरताना नाक व तोंडावर मास्क लावावा.
2. गर्दीच्या ठिकाणी (जसे लग्नसमारंभ, राजकीय, धार्मिक, सामाजिक, सांस्कृतिक कार्यक्रम इ.) जाणे टाळावे..
3. सामाजिक अंतराचे पालन करावे. सार्वजनिक ठिकाणी व्यक्तींनी एकमेकांमध्ये कमीत कमी 6 फूट अंतर (2 गज की दूरी) ठेवावे.
4. आपले हात नियमितपणे साबण व पाण्याने धुवावेत अथवा सॅनिटायजरचा वापर करावा. 5. आंतरराष्ट्रीय प्रवास टाळावा.
6. ताप, खोकला, सर्दी, श्वास घेण्यास त्रास, जुलाब इ. लक्षणे आढळून आल्यास तात्काळ नजीकच्या दवाखान्यास भेट देऊन डॉक्टरांचा सल्ला घ्यावा.
7. कोविड-19 प्रतिबंधात्मक लसीकरण तात्काळ करुन घ्यावे.
8. सार्वजनिक ठिकाणी थुंकु नये.
9. नेहमी खोकताना, शिंकताना नाक व तोंड स्वच्छ रुमालाने / हात कोपरात दुमडून हाताने झाकून कोविड अनुरुप वर्तनाचे (C.A.B.) पालन करावे.
10. शासनाकडून व आरोग्य विभागाकडून वेळोवेळी देण्यात येणाऱ्या सूचनांचे पालन करावे.
असे आवाहन जिल्हाधिकारी डॉ. सचिन ओम्बासे (भा.प्र.से.) जिल्हाधिकारी तथा अध्यक्ष, जिल्हा आपत्ती व्यवस्थापन प्राधिकरण, उस्मानाबाद यांनी केले आहे.
