आरोग्यमंत्री प्रा.डॉ.तानाजीराव सावंत यांच्या संकल्पनेतून जागतिक आरोग्य दिनानिमित्त ‘सुंदर माझा दवाखाना’ स्वच्छता मोहीम
मुंबई : दरवर्षी ७ एप्रिल हा दिवस जागतिक आरोग्य दिन म्हणून साजरा केला जातो. सार्वजनिक आरोग्य विभागाने यानिमित्त यावर्षी राज्यातील सर्व सरकारी आरोग्य केंद्रांमध्ये स्वच्छता मोहीम मा. आरोग्यमंत्री डॉ. तानाजीराव सावंत यांच्या संकल्पनेतून जनमानसात आरोग्य सेवा अधिक सुंदर, स्वच्छ व लोकाभिमुख करण्यासाठी दि. ७ ते १४ एप्रिल दरम्यान “सुंदर माझा दवाखाना’ हा उपक्रम राज्यभर राबविण्यात येणार आहे.
जागतिक आरोग्य दिनाचे घोषवाक्य संपूर्ण जगभरात समान आरोग्य सेवा सुविधांबद्दल जागरुकता पसरवणे आणि आरोग्याशी संबंधित सर्व गैरसमज दूर करणे हा आहे. यासोबतच, विविध आरोग्यविषयक धोरणे तयार करण्यास आणि त्यांची योग्य अंमलबजावणी करण्यास प्रवृत्त केले जाते.
दरवर्षी यासाठी एक थीम निश्चित केली जाते. यंदाच्या आरोग्य दिनाची थीम “सर्वांसाठी समान आरोग्य सुविधा, सर्वांसाठी आरोग्य!” ही आहे.
सरकारी रुग्णालये आणि आरोग्य संस्थेत सर्वांना समान सुविधा उपलब्ध आहेत आणि जास्तीत जास्त लोकांनी सार्वजनिक रुग्णांलयांच्या सुविधांचा वापर केला पाहिजे, याविषयी जनजागृती निर्माण करण्यासाठी सार्वजनिक आरोग्य विभागातर्फे जागतिक आरोग्य दिनानिमित्त "सुंदर माझा दवाखाना" हा उपक्रम राबविण्यात येणार आहे.
सध्या आरोग्य संस्थांमध्ये दर महिन्याच्या पहिल्या शनिवारी स्वच्छता दिवस पाळला जातो. हा स्वच्छता दिवस नियमित राबवायचा असून स्वच्छता दिनाचा कार्यक्रम अधिक प्रभावीपणे राबविण्याच्या सूचना आरोग्यमंत्र्यांनी दिल्या आहेत. त्यानुसार आरोग्य विभागाचे आयक्त मा.धीरज कुमार यांनी सर्व जिल्ह्यांना पत्राद्वारे “सुंदर माझा दवाखाना” हा उपक्रम राबविण्याविषयी सूचना केल्या आहेत. या उपक्रमांतर्गत राज्यातील सर्व आरोग्य संस्थांमध्ये दिनांक ७ एप्रिल ते १४ एप्रिल २०२३ या कालावधीत "सुंदर माझा दवाखाना" हा उपक्रम राबविण्यात येणार आहे.
या उपक्रमात आरोग्य संस्था व भोवतालचा परिसर, सर्व विभाग, स्वच्छतागृहे, भांडारगृहे इत्यादींची स्वच्छता करण्यात यावी, तसेच आरोग्य संस्थांच्या आवारात व दर्शनी भागात सुशोभीकरण, रंगरंगोटी आणि आरोग्य संस्थेमार्फत जनतेला देण्यात येणाऱ्या सेवांचे फलक लावण्यात यावेत, अशा सूचना आरोग्य विभागाचे आयुक्त धीरज कुमार यांनी विभागीय उपसंचालक , जिल्हा शल्यचिकित्सक , जिल्हा आरोग्य अधिकारी यांना दिल्या आहेत.
